Vor vielne Jahr ha ig als Entertainer-Pajass & Moderator amene Gwärbverbands-
alass gschaffet. Zwüsche Apéro u äm erschte Aessensgang hets no 10 Redner
gä, won’i ha chönne asäge. U wius ke Bühni het gha, han’i mir vorgno, dass jede
Redner uf mis chline Schämeli söu schta, wieu d’Zueschouer vom Redner de
grad ä chli me gseh aus nume dr Chopf u das schlussändlich o äm Redner u
sire Konzentration dienet.
Die erschti Person won’i ha dörfe asäge isch die dennzumaligi Berner –
Regierungsrätin Elisabeth Zölch gsi, aber die het partout nid uf das chline
Schämeli ufe wöue. Aber i ha mir öpis überleit u därum hets mi gwautig agschisse,
dass die aus Erschti grad so zickig tuet u de hase haut a Ihrne adrette Füdlibacke
packt use uf ds’Schämeli ufeglüpft. Aes isch aues ganz schnäu gange.
3/4 vo de Gäscht het lut useglachet, 1/4 isch konschterniert gsi. D’Frou Zölch het
lut usegöisset u schlussändlich de o glachet – ja, was söu Sie süsch. Uf jede
Fau isch Sie ufem Schämeli blibe u die nächschte Redner si vo säuber druf.
Aes paar Jahr später ha ig im Aemmital ire bekannte Wärchzüg-Fabrik are
Jubiläumsveranschtaltig aus Komödiant äs Engagement ka. Im Vorfäld vo däm
Event, han’i verno, dass o d’Frou Zölch wieder mit ämene Referat ds’Gast sig.
Offebar het o Sie um mini Awäseheit gwüsst u het überne Mittelsma la mitteile,
dass Sie de nid wieder vom Herr Morelli wöug agseit wärde. Jä nu haut, das
chan’i akzeptiere.
Nacheme Showblock uf dr Verladerampi vor Fabrik, ha’ni die ganzi Gsellschaft
ufene Spaziergang zum nahglägne Schuelhus mitgno u ungerwägs no äs paar
chlini komödiantischi Interventione igflochte. U bis au die viele Lüt i däre Aula hei
Platz gno ka, han’i uf dr Bühni obe amene schöne Flügel no ä chli blueset.
Ir erschte Schtuelreie ha’ni mir vorhär no ä Platz reserviert, schön ir Mitti u dert
bin’i de schlussändlich, zwe Meter vorem Rednerpult, häregsässe!
Ds Wirtschaftsreferat vo dr Frou Zölch isch öpe 25 Minute gange u so lang han’i
Sie, ohni mit ärä Wimpere ds’zucke, i de Ouge fixiert. Ja, i weiss, das isch fies, will
Sie isch tatsächlich i mi Bann grate u het eigentlich schier nume no mi agluegt u
zu mir gredt, obschons im Saal öpe 200 Zuehörer het ka.
No mau äs paar Jahr später, schaffe ig aus Komödiant, im Oberaargau are
Neubau-Iweihig vor’ä grosse High-Tech Bude. 1’500 Gescht si glade gsi. I dr
Phase vom Apéro bin’i aus komische Chäuner mit Champagner ungerwägs u im
Igangs-Berich, wo eis Gedränge isch gsi, han’i ä nöi Fläsche wöue uftue u will die
offebar isch gschüttlet gsi, isch mir vo däm Schumwy vieu usegschprützt. I ha
d’Bsuecher usenander drängt u ha mit ärä Chride ufem Gussasphalt aui
Champagner-Glungene ikreiset, nummeriert, u d’Gescht inschtruiert, uf dass niemer
driine tschaupet.
Wo n’ig am Bode unger das ganze Ritual ha beändet ka u wieder ha wöue ufschta, si grad näbe mir zwöi eleganti Dameschue u drinn schtecke zwöi schöne Wadli. A däne han’i mi ghäbt u mi langsam ufgrichtet u mi ufetaschtet, verbi a zwöi zierliche Chnöi, witer obe zwöi amächeligi Oberschänkle, äs guets Füdle, de dr Buch – i ha ja ungerwägs bim chlätere nid gwüsst, was mi de obe für’nes Gsicht erwartet. I ha dä Körper fescht i mim Griff ka u won’i de o gschtange bi, gsehn’i ersch, dass ig d’Frou Zölch umarme. Mir si beidi rasch verchlüpft, aber gli hei mir üs härzhaft aglachet u i ha zue’re gseit, dass ig ächt erfreut sig, Sie wieder mau ds träffe. Ihre Schofför & Bodygard isch perplex u schtumm wiene Fisch dr näbe gschtange. D’Red wo Sie de später no het gha, han’i nid aglost, han’i vor Jahre scho zwöimau kört.
Aus Künschtler isch’me ja eigentlich nid säute, ä chli ds› Arschloch vo däre Gsellschaft. Aber öpe mau gits sogar imene Galauftritt äs nachhaltigs Fröideli, wie z.B. die «Zölch-Trilogie».
Eh ja, meh aus dr A-Narr ligt eh nid drinn, ä Schteigerig wär höchschtens no Dynamit.